Eit hus som har stått i over hundre år

I 1923 stod handelshuset til Kristoffer Berntin Johnsen ferdig på den nye dampskipskaien i Våge. I 71 år var butikken samlingspunktet i bygda, først med Kristoffer bak disken, så sonen Kåre, og til slutt Torvald og Nelly Hillesvik. Då landhandelen stengde i 1994, vart husa ståande ved kaien og venta på noko nytt.

Det nye kom året etter. Restauranten opna som «Mandelhuset ett rom og kjøkken», oppkalla etter familiebedrifta med brente mandlar i Bergen. På folkemunne heitte han frå første dag berre Mandelhuset, eller Mandelen, og i 2017 forsvann «ett rom og kjøkken» frå logoen òg. Husa har vakse hus for hus: lageret vart Sjøhuset i 2009, Festsalen kom i 2017, og i 2020 fekk det gamle naustet nytt liv nokre meter lenger oppe i fjøra.

Etter pandemien fekk me med oss 145 nye medeigarar frå bygda og vener av huset. Slik vart Mandelhuset ein ekte folkerestaurant: eigd av dei som brukar han, driven for alle som kjem innom.

Me vil vere ein pådrivar for positiv endring i bransjen vår. Det tyder norske råvarer og lokale leverandørar der det går, medvitne innkjøp, mindre svinn og ansvarleg drift av husa våre.